ଧକ୍କା ହେବା ପରେ ହୁତୁହୁତୁ ହୋଇ ଜଳି ଉଠିଲା ଦୁଇଟି ଟ୍ରକ୍ , ଜଣେ ଡ୍ରାଇଭର ଜୀବନ୍ତ ଦଗ୍ଧ

ଭବାନୀପାଟଣାରେ ଭୟଙ୍କର ସଡକ ଦୁର୍ଘଟଣା ଘଟିଛି । ଚାଉଳ ବୋଝେଇ ଟ୍ରକକୁ ପଛରୁ କୋଇଲା ବୋଝେଇ ଟ୍ରକ ଧକ୍କା ଦେଇଥିଲା । ଫଳରେ ୨ଟି ଟ୍ରକରେ ନିଆଁ ଲାଗିଯାଇଥିବା ସୂଚନା ମିଳିଛି । ୨ଟିଯାକ ଟ୍ରକରେ ନିଆଁ ଲାଗିଯାଇଥିବା ବେଳେ ଗୋଟିଏ ଟ୍ରକ ସହିତ ଡ୍ରାଇଭର ଜୀବନ୍ତ ଜଳିଯାଇଛନ୍ତି । ସେହିପରି ଅନ୍ୟଏକ ଟ୍ରକରେ ମଧ୍ୟ ନିଆଁ ଲାଗିଯାଇଥିବା ବେଳ ଡ୍ରାଇଭରଙ୍କର ପତ୍ତା ମିଳୁନାହିଁ । କଳାହାଣ୍ଡି ଜିଲ୍ଲା ସଦର ଥାନା ପାସ୍ତିକୁଡା ନିକଟରେ ଏପରି ମର୍ମନ୍ତୁଦ ଦୁର୍ଘଟଣା ହୋଇଛି ।

ସୂଚନା ଅନୁସାରେ, ଆଜି ସକାଳ ୪ଟାରେ ଏହି ଦୁର୍ଘଟଣା ହୋଇଛି । ଚାଉଳ ବୋଝେଇ ଟ୍ରକଟି ଛିଡା ହୋଇଥିବା ବେଳେ ତାକୁ ଏକ କୋଇଲା ବୋଝେଇ ଟ୍ରକ ଧକ୍କା ଦେଇଥିଲା । ତେବେ କୋଇଲା ବୋଝେଇ ଟ୍ରକ ଚାଳକ ସହିତ ଟ୍ରକଟି ସମ୍ପୂର୍ଣ୍ଣ ଜଳିଯାଇଥିଲା । ଖବରପାଇ ଅଗ୍ନିଶମ ବାହୀନି ନିଆଁକୁ ଆୟତ୍ତ କରିଥିଲେ ହେଁ ଜୀବନ ବଞ୍ଚାଇବାରେ ସମ୍ଭବପର ହୋଇପାରିନଥିଲେ ।  ତେବେ କେଉଁ ପରିସ୍ଥିତିରେ ଦୁର୍ଘଟଣା ଘଟିଲା ତାହା ବର୍ତ୍ତମାନ ସୁଦ୍ଧା ଜଣାପଡିନଥିବା ବେଳେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।